2023年9月
喺里約玩咗幾日之後，我哋就飛去巴西嘅心臟地帶——首都巴西利亞。一落機我就feel到同里約好唔同，呢度個機場又新又通爽，而且管理得好好，真係幾impressive。Priscila嘅男朋友Sergio好好人，揸車接我哋去Chapada dos Veadeiros。
由里約到首都：巴西利亞嘅第一印象
沿途最先留意到嘅係，呢度所有嘢都好井然有序——馬路又闊又平，街道又乾淨，同里約周街都係深色車窗好唔同。巴西利亞唔似一個有幾百年歷史嘅城市；佢感覺好後生，設計過、規劃過咁。
我哋喺Vó Belmira停低食小食，呢間舖頭仔個粉紅色牆身真係好搶眼，好有特色。一出市區，生活節奏好似慢晒咁。我哋試咗啲地道小食：pamonha同empada，兩樣都好好味。個pamonha令我諗起香港端午節食嘅糭。我仲第一次試咗Guaraná Antarctica汽水——甜甜酸酸咁，幾refreshing，值得一試。
餐廳: Vó Belmira(Google Maps)
---安靜抵達，卻傳來壞消息
食完嘢，我哋繼續向住目的地Alto Paraíso de Goiás進發，去到就check in咗間家庭式經營嘅民宿。一到埗，層層疊疊嘅山景就映入眼簾——真係好似postcard咁靚。我即刻覺得平日嘅壓力消失曬，成個人都平靜落嚟。
點知，突然收到個unexpected嘅message：啊爸好唔舒服。我遠在地球嘅另一邊，幫唔到啲乜，而且仲搞到爸媽原本要去意大利同英國嘅行程要取消。又擔心又傷心，最後成晚都忙住搞啲旅行計劃——重新訂機票、取消部分行程、同埋不斷覆訊息。終於搞掂晒所有嘢之後，我同朋友一齊去咗La Parrilla食晚餐，呢間扒房有個好靚嘅露台，中間閃令令嘅藍色水池。依度嘅牛扒好食，個環境都好chill，食餐番好嘅心情都好番啲。
住宿: Pousada Casa de Shiva(官方網站/Qantas Hotels)
---走入大自然：挑戰行Trilha dos Saltos, Carrossel e Corredeiras
第二日一早就起身，喺民宿食完份即叫即做嘅早餐。點解咁早起身？因為我哋準備去挑戰Trilha dos Saltos, Carrossel e Corredeiras——一條10.9公里長嘅行山徑。聽落可能唔係好難，但對於我呢個城市人嚟講，真係一個大挑戰。
條路好多上落斜，仲有好多樓梯，行完真係成個cardio workout咁。但每滴汗都流得值得。沿途經過好多好靚嘅景點——好似Salto 80咁嘅瀑布、好深嘅峽谷，仲有好多令人嘩一聲嘅靚景。啲風景靚到一個點，直頭幫我紓緩咗身體上嘅疲勞。
話雖如此，我都低估咗自己需要幾多水。我支2公升水好快就飲晒，搞到要成日停低休息。最深刻嘅一刻？俾個中年以色列男人快過我——佢仲要係著住人字拖！講起都想努力做運動！
行完山，我即刻獎勵自己一罐冰凍可樂。我平時其實唔係好飲汽水，但嗰一刻，佢簡直係天降甘露。凍冰冰、甜甜哋、有氣——純粹嘅清爽。之後我哋去咗Rústico Premium Grill食咗餐豐富嘅午餐，佢嘅牛扒燒得啱啱好，夠曬juicy。食飽飽、心滿意足，終於可以休息吓，我哋就返咗民宿，飲咗幾杯嘢，然後就瞓覺喇。
餐廳: Rústico Premium Grill(Google Maps)
---地球上嘅月球地貌：Vale da Lua
第二日，我哋就出發去Vale da Lua，即係「月亮谷」。佢真係名符其實，呢個地方好似嚟自另一個星球咁。個山谷全部都係好巨型、好平滑、幾乎係平嘅石頭，經過時間同水流嘅沖刷，變成而家咁嘅形狀。有啲石面仲好似波紋咁，造就咗一種超現實嘅質感，真係好似月球表面。
行喺啲石頭上面，感覺好神奇。如果你唔理啲綠色植物，真係會以為自己喺月球上嘅一片石灘。呢條路比前一日行嗰條易好多——似係輕鬆散步咁，行得好舒服。Vale da Lua好寧靜，風景又靚，帶俾我哋一個完全唔同嘅大自然體驗。
Chapada嘅最後滋味
喺Chapada嘅最後一晚，我哋慢慢咁喺市中心行街，享受吓呢度悠閒嘅氣氛。第一站？緊係雪糕啦！
我地去左一間有超過30種口味嘅雪糕舖。依度嘅雪糕你可以自己任𢳂，然後秤重計錢，小心唔覺𢳂多左啊！溫馨提示：如果你帶住小朋友，記得睇實佢哋——佢哋可能會將你個銀行戶口𢳂到乾塘㗎！
夜晚，我哋去咗Jambalaya食飯，呢間非洲裔美國餐廳係朋友極力推介嘅。佢哋真係冇介紹錯。
今次係我第一次試jambalaya，呢係一道以飯為主嘅菜式，源自非洲裔美國人同克里奧爾菜。佢辣得啱啱好，可以喚醒你嘅味蕾——食完會上癮，暖笠笠又好舒服。可能我係亞洲胃啦，但一碗好嘅飯菜總係會令我心心眼。
呢一晚真係完美嘅ending——好味、放鬆，加good vibes。
餐廳: Jambalaya(Google Maps)
---後記
Chapada dos Veadeiros唔只係一個旅行目的地——佢係一個身心靈嘅重設。由行山、瀑布、奇石到治癒心靈嘅美食，我重新發現咗與世隔絕、沉浸喺大自然嘅美好。雖然呢次旅程情緒上有高有低，但離開嗰陣，我覺得個人輕鬆咗，亦更感恩。巴西總係俾到驚喜我，而Chapada永遠會喺我記憶中佔據一個野性又寧靜嘅角落。
0 留言