澳洲航空嘅oneworld Classic Rewards真係物超所值。坐商務艙環遊世界可能聽落似係明星或者公司高層嘅專利，但只要用啱策略，加上儲夠澳洲航空里數，原來你同我都係可以做到㗎！我最近就係用oneworld Classic Rewards，完成咗一次商務艙環遊世界之旅，所以想同大家分享我嘅經驗，等你都可以做到。
呢份攻略會講解呢個獎勵係乜嘢、點樣預訂，仲有我個人嘅成功秘訣。
咩係oneworld Classic Rewards？
Oneworld Classic Flight Reward係兌換澳洲航空積分最抵嘅方法之一，佢可以俾你用固定嘅里數，根據飛行距離預訂一個涵蓋多個大洲嘅寰宇一家航空公司行程。如果係兌換高級客艙嘅話，真係超抵。
主要規則：
- 你嘅行程必須包括除咗澳洲航空之外，至少兩間「寰宇一家」成員航空公司。
- 你唔可以包括非「寰宇一家」成員航空公司，例如唔屬於「寰宇一家」嘅捷星航空同阿聯酋航空。
- 總飛行距離必須喺56,315公里（35,000英里）或以下。
- 佢係以來回行程計嘅，即使你只係飛單程，距離同里數都會計埋無飛嘅回程距離。
- 你最多可以有五個中途停留點(stopever)，但每個城市只可以停留一次，每個城市最多兩次轉機(transfer)。
- 陸路交通（喺機場之間嘅陸路行程）係可以嘅，但呢啲城市之間嘅距離仍然會計入你行程嘅總距離。
- 如果你坐唔同艙位，成個行程會以最高艙位嘅里數計算。
善用呢個獎勵，你就可以用大概一至兩成嘅成本，坐商務艙環遊世界啦！
係好難訂，但又絕對值得
搵獎勵機位，尤其係商務艙，其實真係唔係咁容易。始終國際航線嘅高級艙位供應有限，而且需求好高。經濟艙機位比較容易搵到，但商務艙同頭等艙獎勵機位好快就被精明嘅旅客搶晒。
一啲「寰宇一家」嘅合作夥伴，例如芬蘭航空、日本航空（JAL）同國泰航空，喺放商務機位方面就比較大方，基本上如果你夠早搵定就會搵到。
另一方面，卡塔爾航空雖然評價好好，但係基本上用澳洲航空里數係好難預定佢地嘅獎賞機票。截至2025年5月，卡塔爾航空通常只會喺起飛前30日先放出獎勵機位，而且通常只係經濟艙。如果你計劃提早預訂高級艙等嘅話，卡塔爾航空可能唔係一個可靠嘅選擇。
雖然搵機位唔容易，但係佢嘅價值係無可置疑嘅。只要有恆心同埋保持行程彈性，你一定可以砌出一個環繞地球嘅夢幻行程嘅！
我係點樣book我嘅環遊世界商務艙之旅呢？
講真，我其實都用左唔少時間去搞清楚晒規則同搵機位。經過幾十次地氈式咁搵機位，阿媽我終於得咗喇！以下係我嘅方法，如果你都打算咁做，不妨參考吓。
1. 提早計劃
大多數獎勵機位會喺出發前一年放出。芬蘭航空同日本航空通常喺出發前10-12個月會有好多機位，特別係商務艙。如果你想鎖定長途行程，提早預訂係你最好嘅機會。
最正嘅係：如果你嘅計劃有變，取消只係需要6,000里，改行程只需要5,000里。所以，儘早鎖定左機位先，之後有需要再改都唔會肉赤㗎。
2. 發揮創意
預訂oneworld Classic Rewards其實好考你創意plan行程。有時，去目的地最好嘅路線並唔係最直接嗰條嘅，只要有少少彈性，兜個細圈，可能你會發掘到一個新嘅景點呢！
例如，我最初計劃從英國去意大利，然後再繼續去杜拜。但係，我發現喺我首選嘅日期，由意大利去杜拜嘅航班冇位，而且由杜拜去東亞嘅選擇都好有限。所以，我需要調整我嘅路線，改為先飛英國-杜拜-意大利。
另外，oneworld Classic Rewards允許唔超過24小時嘅長時間轉機被視為「轉機」，即係你可以利用轉機嘅時間探索一個新城市，而唔計作中途停留。雖然係短暫停留，但係呢啲轉機都可以係充分利用你旅程嘅好方法。
只要發揮你嘅小宇宙同埋保持靈活性，你就可以將一個簡單嘅航班行程轉化為一個意想不到嘅額外旅程！
3. 保持彈性
彈性係成功預訂oneworld Classic Rewards嘅關鍵元素之一。雖然有時候真係好難搵到你想要嘅完美嘅航班，但係只要願意退一步調整以下行程，可能就一天都光曬。
有時，完美嘅直飛航班可能喺你首選嘅日期冇位，但如果你願意考慮早幾日或遲幾日，你通常會都會搵到適合嘅航班。喺旅行日期上少少彈性，可以解鎖更多高級客艙機位，令你可以搶到嗰啲好搶手嘅商務艙座位。
另外，你可以考慮下其他路線，例如有轉機嘅航班。你可能會發現一個有轉機嘅航班，即使多咗個停留點，都完全符合你嘅行程安排㗎。始終，你越有彈性，你就有越多機會設計出理想嘅旅程！
4. 淡季出發
獎勵機位喺旅行旺季，例如學校假期、聖誕節同復活節期間，會受到嚴格限制。航空公司通常會完全「封鎖」呢啲時段。
我揀左喺八月尾到十月中旅行，咁樣我就避開曬啲高峰期。喺依段時間，我到訪嘅大部分目的地天氣都好好，而且熱門景點嘅人流都比較少，簡直係雙贏。
5. 堅持不懈
如果第一次搵機位一無所獲嘅話，千祈唔好放棄啊，我嗰陣時就養成咗每隔一晚就search嘅習慣。每次其實都只係需要幾分鐘，但係有時真係會搵到機位突然放左出嚟。
如果你見到有關鍵嘅航段有位，唔好諗即刻book！如果其他你想要嘅航班仲未有位，你隨時可以之後再加，更改或者添加航班只係需要5,000里㗎咋！
點樣搵獎勵機位呢？
只要用啱工具，行程規劃就會變得容易好多㗎啦。
澳洲航空網站上嘅multi-city booking tool係你嘅好朋友。跟住下面個步驟做啦：
- 選擇 “Book with Rewards.”
- 輸入你想要嘅航班航段同日期。
- 剔選 “Flexible with dates for all flights.”
你會去到calendar view，顯示每週每班航班嘅供應情況。啲icon會指示邊一日有乜嘢艙等機位，經濟艙、豪華經濟艙、商務艙或頭等艙都有㗎。
呢個工具可以幫你好快咁搵到有獎勵機位嘅日期，唔洗逐個逐個日期去估。
另一個好有用嘅工具係gcmap.com。佢可以幫你計你計劃航線嘅總距離，你只要輸入機場代碼（例如：SYD-HND-HEL-LHR-JFK-LAX-SYD），佢就會話你知有冇低於56,315公里嘅限制。呢個方法可以幫你慳番好多時間，同埋確保你嘅行程符合oneworld Classic Rewards嘅規則。
總結
Oneworld Classic Flight Reward係其中一個最抵換嘅機票。只要一啲策略、創意同埋堅持不懈，你就可以平住咁坐商務艙環遊世界，享受平躺飛行、貴賓室同埋優先待遇，將你嘅旅程從簡單嘅交通方式昇華成一種享受。
0 留言