喺2023年嘅時候，我實現咗一個夢想：就係用短短50日環遊世界。更難忘嘅係，成個旅程嘅所有長途機我都係歎住商務艙！你可能會好奇，究竟要用幾多錢呢？少年你太年輕了，搭商務艙，用澳洲航空里數就得啦！
諗返轉頭，其實多得商務艙嘅種種禮遇，成個旅程先至會咁順利咋！由機場開始，可以享受好似國泰玉衡堂呢類頂級貴賓室嘅服務，入面有得梳洗休息，仲有得醫下肚；起飛前又可以嘆杯香檳，到萬呎高空換件睡衣，舒舒服服平躺瞓個靚覺；加上優先辦理登機手續同登機、仲有更寬裕嘅行李額，真係令到成個旅程舒服得多。
以下係我喺呢次環遊世界嘅航班詳情：
| 航班 | 航空公司 | 艙等 | 出發地 | 目的地 | 俾錢方式 |
|---|---|---|---|---|---|
| QF 27 | 澳洲航空 | 商務 | 悉尼（SYD） | 聖地牙哥（SCL） | 里數+稅 |
| LA 770 | 南美航空 | 特選經濟 | 聖地牙哥（SCL） | 里約熱內盧（GIG） | 課金 |
| JJ 3791 | 南美航空 | 經濟 | 里約熱內盧（SDU） | 巴西利亞（BSB） | 課金 |
| AD 6001 | 巴西蔚藍航空 | 經濟 | 巴西利亞（BSB） | 聖保羅（CGH） | 課金 |
| BA 246 | 英國航空 | 商務 | 聖保羅（GRU） | 倫敦（LHR） | 里數+稅 |
| BA 1484 | 英國航空 | 經濟 | 倫敦（LHR） | 格拉斯哥（GLA） | 里數+稅 |
| U2 204 | 易捷航空 | 經濟 | 格拉斯哥（GLA） | 布魯斯托（BRS） | 課金 |
| BA 109 | 英國航空 | 商務 | 倫敦（LHR） | 杜拜（DXB） | 里數+稅 |
| RJ 615 | 約旦皇家航空 | 商務 | 杜拜（DXB） | 安曼（AMM） | 里數+稅 |
| RJ 101 | 約旦皇家航空 | 商務 | 安曼（AMM） | 羅馬（FCO） | 里數+稅 |
| AZ 426 | 意大利航空 | 經濟 | 米蘭（LIN） | 漢堡（HAM） | 課金 |
| AY 1424 | 芬蘭航空 | 商務 | 漢堡（HAM） | 赫爾辛基（HEL） | 里數+稅 |
| JL 48 | 日本航空 | 商務 | 赫爾辛基（HEL） | 東京（HND） | 里數+稅 |
| JL 29 | 日本航空 | 特選經濟 | 東京（HND） | 香港（HKG） | 里數+稅 |
| QF 30 | 澳洲航空 | 商務 | 香港（HKG） | 墨爾本（MEL） | 里數+稅 |
旅程
我真係發夢都無諗過30歲之前可以實踐環遊世界嘅夢想，而現實係成個旅程都真係好似發左一場夢咁。喺度我真係想多謝到訪每個國家嘅時候款待我嘅朋友同親人，非常感激。
今次旅程有非常多美好嘅回憶。其中一個最難忘嘅亮點，就係親眼見到里約熱內盧嗰個標誌性嘅基督像—-我終於唔係喺教科書上面睇相啦，佢係真真實實咁聳立喺我眼前。另外喺蘇格蘭，我仲好好彩睇到蘇格蘭同英格蘭之間嘅歷史性150週年足球賽，真係超興奮！唔講你唔信，我甚至喺巴西飛英國嘅時候撞到足球明星Emerson Royal添！
喺蘇格蘭嘅時候，我仲搭左咗「哈利波特火車」，Jacobite，佢會經過好經典嘅格倫芬南高架橋。呢條橋正正就係電影中，哈利同榮恩揸住飛天汽車同霍格華茲特快列車比賽嗰個場景出現嘅橋，真係一個好夢幻個體驗，好似穿越左哈利波特嘅電影時空咁。
喺杜拜嘅時候，我同朋友去咗衝沙，嗰種刺激嘅感覺就好似沙漠入面玩緊過山車咁。我哋仲試咗騎駱駝，甚至去埋室內滑雪，杜拜真係令我大開眼界。
到意大利嘅時候，羅馬俾我嘅第一印象就好似行緊喺一本活生生嘅歷史書上面咁。當你企喺羅馬鬥獸場前面，又或者喺列入文化為產嘅小鎮漫步，眼前個景色珍惜每一幕都令我嘩嘩聲。另一方面，意大利嘅沿海城市，就好似五漁村咁，又喺另有一番風味。嗰種悠閒嘅節奏，加上迷人嘅無敵大海景，真係令人陶醉，配上美酒佳餚，簡直係人間天堂。
到返返去亞洲，日本係我嘅第一站。日本係我一直以來最鍾意嘅目的地之一，雖然今次已經係我第三次到訪東京，但係我真係好鍾意依度嘅秩序、魅力同方便，而且每次黎都有新嘢發現。
最後一站係我嘅第一個屋企：香港。今次我嘅行程可以話係排得密密麻麻，儘量爭取每一刻同朋友家人見面嘅時間。無辦法啦，自從我搬咗去墨爾本之後，每年都只係可以見到父母一兩次，所以同佢地相處嘅時間特別珍貴。遊歷完大半個地球後，再次講廣東話，盡情享用我喜愛嘅菜式，同埋去番我成長嘅地方，一點一滴都令我感到非常窩心。
回顧呢次旅程，唔單止係講飛行嘅距離，更重要嘅係創造出嚟嘅回憶--係人、地方同埋將一生難忘嘅體驗串連起嚟嘅每個時刻，可以話係非常值得。
咁，我所有航班總共洗咗幾多錢呢？
多得澳航嘅oneworld® Classic Rewards，我所有長途商務艙航班都只係用咗 318,000 澳洲航空積分 (另加稅費) 咋～雖然呢個獎勵由2025年8月5號起會加到365,800分，但對於咁遠嘅行程嚟講，佢依然都係非常抵啊！
我兌換嘅航班包括由雪梨去聖地亞哥、聖保羅經倫敦去格拉斯哥、倫敦去杜拜、杜拜經安曼去羅馬、漢堡經赫爾辛基去東京，同埋香港返墨爾本。
我喺規劃行程嘅時候做咗幾次行程更改，所以用多左20,000積分。除此之外，我仲用咗34,500積分，換咗張東京飛香港嘅last-minute特選經濟艙機票。
所有獎勵機票預訂加埋，我大約俾咗2,500澳元嘅稅同其他航空公司費用。另外，我亦用咗大約1,100澳元買咗其他短途機票。如果我用現金預訂所有呢啲航班，費用好容易就會過萬蚊澳元，呢次用里數換機票真係抵到爛！
✈️ 總結：里數令你夢想成真
我真係發夢都諗過可以咁後生就環遊到世界，重要係搭business class去。今次用Qantas積分兌換咁多程長途商務艙，令呢次旅程唔單止舒服，仲令我喺成個行程都keep住精神飽滿，可以以最佳狀態體驗唔同國家嘅景色同文化。最重要嘅係，我唔洗用好多錢！
今次原本會成幾萬蚊澳紙嘅旅行體驗，我只係用左318,000 Qantas積分 (另加少少額外積分用黎改行程)、俾多大約2,500澳元嘅稅，加埋1,100澳元買短途機票，就成功book到。所以平時唔好睇少你啲里數啊，今次旅程就展示咗如果我地用得啱，其實真係會幫你慳番好多錢。
除左豪華嘅飛行體驗之外，真正令呢次旅程難忘嘅，其實係每一個特別時刻。喺五漁村睇日落、近距離欣賞基督像、搭Jacobite蒸汽火車，又或者只係同屋企人共度溫馨時光，每一刻我都非常享受。
無論你係儲里數嘅新手定係經驗豐富嘅旅行達人，呢個旅程都提醒我哋：只要有少少規劃同靈活性，個世界真係可以屬於你嘅，最重要嘅係唔需要大出血。
最後，我製作咗一個我旅程嘅影片，希望你哋鍾意！
0 留言