玩轉七彩里約

2023年9月

登陸里約：深刻嘅第一晚

Brazil, here I am!

我嘅巴西之旅由降落里約熱內盧一刻開始，記得出發起飛之前，我個當地朋友就提醒過我：「喂，去里約記住睇實啲財物呀，雖然呢度好靚，但係啲賊有時都幾狼死㗎！」呢句說話一直喺我腦海入面徘徊，搞到我落機嗰陣，雖然非常興奮，但係都忍唔住有少少緊張。

好彩我朋友真係夠義氣，預先幫我安排咗專車接送，由機場直到我哋約好位於Ipanema嘅酒店。一上車，我首先發現里約啲車九成九都用咗深色玻璃嘅，搞到外面所有嘢都好似蒙咗層灰咁，特別係太陽落咗山之後，更加係影影綽綽。

Sunset over Rio, dark silhouettes of trees drifting past through tinted glass as I traveled from the airport to the city. A hint of nervousness lingered—it was my first time in Brazil—but excitement quietly bloomed beneath it all.

我哋咁啱撞正放工時間，高速公路都塞到好似冇盡頭咁。啲電單車就係我架車隔離左穿右插，捐嚟捐去完全唔驚。我睇到眼都凸埋，但係心裡面諗：如果我識揸電單車又冇行李喺身，分分鐘快一半時間就到酒店啦！

過左一陣之後，終於見到多啲燈火，我哋原來已經到咗Ipanema區，我見入到繁榮嘅市區有少少鬆一口氣嘅感覺。此時此刻，我實在有啲攰又有啲肚餓，我嗱嗱臨搞掂酒店入住手續，然後好快咁同當地朋友會合，直衝去食飯。

Boteco Belmonte 啲小食不斷送上嚟，睇到都流晒口水！

仲有更多好味到震嘅小食

洋蔥烤肉加木薯，大滿足！

去到巴西，梗係要學巴西人咁食嘢啦！我哋去咗 Boteco Belmonte，係呢度好出名嘅酒吧餐廳。佢有幾層高，成間舖頭都熱熱鬧鬧，仲有現場音樂勁有氣氛！巴西嘅夜生活真係唔講得笑，當我朋友話「巴西唔係俾新手玩㗎」嗰陣，我終於明白佢講乜。

我哋喺二樓搵到張檯，嗰度係半開放式咁，間中有涼浸浸嘅海風吹入嚟，好舒服。我哋坐喺度一路享受住音樂，一路感受里約夜生活嘅節奏。我哋今次叫咗烤肉 (carne assada) 同炸木薯 (mandioca frita)，仲有幾杯巴西人最愛嘅生啤（chopp）。

等緊主食嗰陣，啲侍應會不停咁傳啲小食盤俾你揀，有啲餡餅、炸嘢，仲有好多款一口size嘅美食。每一樣都睇到我流晒口水，而且每一樣都真係好好味！呢個第一晚真係無得頂：熱鬧、好味，仲有少少狂野，就好似里約呢個城市咁。

餐廳推介: Boteco Belonte (Google Maps)

基督像下望世界，植物園尋清幽

小劇透：由基督像腳下望出去，里約呢個無敵大景真係靚到暈！

向高處進發！呢個係Corcovado山嘅電車入口，我哋出發去睇靚景。

越嚟越近啦... 終於可以睇清楚宏偉嘅基督像！

企喺基督像腳下，俯瞰無邊無際嘅里約。

喺基督像前面自拍一張。

里約真係一個充滿新奇嘅地方！第二日我哋就搭電車上山，去睇吓世界七大奇蹟之一嘅「基督像」。電車上面可以話係人山人海，但係都阻唔到我衝上Corcovado山頂嘅決心！

好彩九月天氣唔算太熱，排隊嘅時候都頂得順。喺電車上向下望，成個城市嘅景色已經靚到爆，但係始終都唔及落車一刻見到基督像豎立喺你面前嗰一刻咁震撼！我真係唔敢相信自己對眼，企喺基督像下面，我感覺自己好渺小，但同時又驚嘆到講唔到野。佢足足有 30 米高，係巴西工程師 Heitor da Silva Costa 同法國雕塑家 Paul Landowski 合作起嘅，1931 年起好，象徵住和平同信仰。

抬頭望住啲高聳嘅棕櫚樹，好似入咗個大自然嘅廟宇咁，陽光從樹葉罅滲落嚟，好有feel。

石製噴泉嘅潺潺水聲，俾人一種好平靜嘅感覺，可以抖一抖，好好感受呢個花園嘅寧靜美。

池塘上面漂浮住巨型睡蓮葉，每一塊都好似完美嘅綠色碟子咁，將天空同周圍嘅樹影都映晒出嚟。

呢幅有質感嘅石牆為花園增添咗少少歷史感，佢嗰種歲月痕跡同鮮豔嘅綠色形成咗一個對比。

正當我仲未完全消化晒嗰個見到基督像嘅震撼，因為時間關係，我哋就趕住去里約熱內盧植物園。植物園位於 Lagoa Rodrigo de Freitas 西邊，裏面有好多巴西本土嘅植物，例如仙人掌、浮水蓮花、鳳梨科植物等等。行喺高聳棕櫚樹嘅樹蔭下，我感覺自己好似去咗另一個世界咁，完全離開咗城市嘅喧囂。嗰一刻好平靜，完全融入左大自然裏面。

Oro 米芝蓮盛宴

喺米芝蓮兩星餐廳 Oro 嘅二樓，氣氛唔錯。

味蕾嘅享受：新鮮生蠔遇上獨特嘅jabuticaba果甜加上紫蘇嘅草本清香。

藝術級嘅頭盤，可以話係視覺同味覺嘅享受，依幾道分別係魚、蜜瓜同抹茶；蝦同南瓜；同埋牛肉他他飯。

Oro 對越南麵包嘅精緻演繹。

魔鬼魚嘅鮮味配搭味噌嘅鮮甜同埋芥蘭嘅爽脆，簡直係天作之合！

喺 Oro 嘅美食之旅，最後以優雅又清新嘅 "All Coconut" 甜品完美作結。

嗰日晏啲，我哋去咗一間位於Leblon區嘅米芝蓮兩星餐廳 — Oro。呢間現代巴西高級餐廳真係超出我預期。嗰日我哋坐喺樓上，上面好 cosy 得幾張檯，氣氛好舒服。

我哋揀咗個叫「Afetividade」嘅 Tasting Menu，依個 set 有 11 款創意小食，兩款精緻主菜，仲有甜品。再配埋支冰凍嘅 Rosé 葡萄酒，真係冇得頂！成餐飯由一系列色彩繽紛嘅菜式開始，之後一碟靚過一碟，簡直係視角嘅享受。另外每道菜都用咗新鮮嘅當地食材，擺盤好似藝術品咁。有啲菜仲帶有少少亞洲風味，例如手卷、越南麵包咁。我最鍾意係嗰隻生蠔，好新鮮又肥美，仲有魔鬼魚，用味噌輕輕煮過，味道超正！呢個真係一次好出色嘅美食體驗，完全感受到巴西菜嘅進化。

餐廳推介: Oro (Google Maps)

麵包山睇盡靚景，明日館穿越時空

我哋開始搭纜車上麵包山啦！

喺麵包山纜車望出去，里約嘅迷人海岸線同埋城市景色映入眼簾。

嚟到麵包山纜車嘅中途站，依度有色彩繽紛嘅藝術品同埋歷史介紹。

飛機迷嘅天堂呀～喺麵包山可以睇到 Santos Dumont 機場，依度有好多飛機升降。

喺麵包山頂影低呢啲靚到窒息嘅里約背景，留下美好回憶。

睇吓推動纜車嘅齒輪，多得佢哋，麵包山纜車可以行得咁順暢。

第二朝食咗個豐富嘅早餐之後，我哋就開始向里約另一個地標——麵包山進發。喺地面望上去，佢好似兩塊巨型石頭突然從海中拔地而起咁，好似大自然特登擺喺海中央，營造戲劇效果咁。

我哋用 VIP 飛，唔使排隊就搭纜車直上山頂。一到山頂，成個里約係我眼前一覽無遺。其中貧民窟同豪宅區嘅強烈對比，真係好觸目。呢種反差就係呢個城市嘅特色，非常之真實。但係對我嚟講，更興奮嘅係可以見到飛機喺旁邊嘅 Santos Dumont 機場升降，對於航空迷嚟講，簡直係夢幻情景！

我哋一日之計，就由輕鬆行下明日博物館開始！佢係一座好有型嘅現代建築，同里約海濱相映成趣！

水池邊享受住平靜一刻，Ernesto Neto 嘅「Puffed Star II」雕塑真係好搶fo。

喺明日博物館旁邊漫步，好chill～

入到去管入面，我哋慢慢探索「四大洋」展覽，對地球水域之間嘅互相連繫，有咗更深嘅了解。

我哋喺其中一個展覽停低，裏面有啲內容好值得我地細味反思。

明日博物館，再會。

下晝我哋去咗充滿未來感嘅 Museu do Amanhã (明日博物館)。佢嘅建築風格令我諗起西班牙巴倫西亞嘅藝術科學城，白色嘅魚骨狀結構，浮喺水池上面。博物館入面一樣咁前衛，有好多高科技嘅互動展品，探討可持續發展、科技同人類未來。我非常欣賞入面啲展覽，但係唔好唔記得要圍住博物館本身行下，欣賞佢水邊嘅環境。

後記

喺空中俯瞰Ipanema，呢個景真係無得輸！

里約，我地下次再見啦！

我諗我一世都唔會忘記 Ipanema 嘅靚景，同埋踏足呢個世界級城市嘅感覺。由熱鬧嘅酒吧同傳奇地標，到高級餐廳同現代博物館，里約熱內盧留俾我嘅回憶，就同呢個城市一樣咁色彩繽紛。

今次去里約玩得好開心，不愧為巴西其中一個最受遊客歡迎嘅城市。接住落嚟，跟我一齊探索巴西嘅未來之都：巴西利亞！

住宿推介: Sol Ipanema Hotel(Official/Qantas Hotel)