由里數到競投,依個就係幫你upgrade嘅秘笈!
唔知打家有無同感:喺上飛機嘅時候向左轉,個心裡面會爽左一下,尤其係當你無俾full fare嘅時候!不論係用里數upgrade,定係俾多少少錢bid,又或者好彩喺機場被人upgrade,依一趟嘅飛行都隨時變成旅程嘅其中一個highlight。
所以今次會同大家分享下,究竟有咩最實用又易入手嘅方法去升級機位。由一早可以計劃嘅策略,到最後一刻去到機場嘅方法,都會一一講到。無論你係咩旅行風格,定係飛行里數有幾多,總有一條路可以幫你「升呢」你嘅旅程!
1. 用里數換升級
如果你儲咗一大堆飛行里數,咁你係時候可以用一用佢喇!好多主要航空公司都俾你用積分升級去高一級嘅機艙,分分鐘性價比仲高過你直接用里數換經濟艙獎勵機票㗎。不過升級機位數量有限,而且通常會優先俾啲高級會員嘅,但係點都搏一搏,單車可能變摩托呢。
- Qantas Classic Upgrade Rewards:可以用積分申請升級合資格嘅付費機票。佢哋有條優先排隊系統,高級會員會優先處理,同埋會考慮申請時序,所以最好早啲申請啦。另外,得閒留意下座位表有幾多吉位,咁你就大概估到有極幾大機會upgrade到。
- Virgin Australia UpgradeMe Points:大部份票種都可以用積分升級。如果獎勵機位有位,可以即時確認;如果唔係就要排隊等,視乎供應而定。
- 國泰, 新加坡航空,同埋其他航空公司,好似 卡塔爾航空同全日空都有提供積分升級,不過每間公司對機票資格同供應都有唔同規定。
小貼士:直接同航空公司訂機票,票種合資格申請里數升等機會會大啲。
2. 出價 Bid Upgrade
近年Bid Upgrade越嚟越受歡迎,當你訂咗合資格嘅機票之後,你間中會收到邀請去出價投upgrade。如果競投成功,你就可以用一個平好多嘅價錢坐高級啲嘅艙等。
- Qantas Bid Now Upgrades:呢個係喺 Classic Upgrade Rewards 之後先處理,如果你里數唔夠嘅話,都可以試下。
- Virgin Australia UpgradeMe Premium Bid:可以直接bid商務艙,你仲可以喺起飛前幾個鐘隨時調整你嘅出價添。
我試過一次,由墨爾本飛香港,用 Virgin Australia UpgradeMe 競投升級,講緊都只係 610 澳紙單程!呢個價錢有得平躺,有好好嘅服務同餐飲,仲有得入埋lounge,真係好抵!(好掛住 Virgin A330 呀)
3. 機位調動「Op-Ups」
有時航空公司會因為營運需要而幫乘客升級,呢啲就叫做「Op-Ups」。呢啲升級真係睇你好唔好彩,當航空公司經濟艙超賣,或者臨時換咗飛機影響到座位安排時,佢地會揀人嚟升級。雖然好難預測,但有啲因素可以增加你嘅機會,例如提早 Check-in、訂位時有輸入會員號碼,同埋自己一個飛。
我之前試過一次搭 Qantas 由香港飛墨爾本,喺登機閘口 Check App 嗰陣,發現我個經濟艙位靜靜雞咁變咗去前面嘅商務艙!完來係前一日嘅航班延遲咗一日,之後座位要重新安排過,而我就成為左幸運兒啦。不過我當時只係最低級嘅Qantas銅卡會員,只係多左個Qantas Club會籍,所以對我嚟講真係好驚喜!
4. 補差價升級
如果你想穩陣啲,直接補差價升級係最直接嘅方法。有啲航空公司允許你升級部分行程,例如單程升級。如果你需要確保落機嘅時候要保持最佳狀態,直接俾差價都未嘗唔係一個辦法。雖然呢個通常係最貴嘅選擇,但係就保證有位。
5. 機場即場升級
就算你去到出發日都upgrade唔到,都唔好放棄呀!好多航空公司會喺 Check-in 嘅時候提供即場升級優惠,呢啲優惠通常會比正價商務艙平一截㗎。
我最近搭日航由大阪飛東京都即場用左只係2,200日圓,就由經濟艙upgrade上 Class J(類似豪華經濟艙)。雖然只係一個鐘嘅短途機,但係一個價錢真係絕對對得起一個升級嘅舒適。
6. 服務補償升級
有時航空公司都會有甩轆(touch wood)嘅時候,就好似航班超賣、轉機甩拖、或者延誤。當呢啲情況發生,如果下一班機嘅高級艙位有吉位嘅話,航空公司可能會提供升級作為服務補償,但係呢啲通常係酌情處理同埋喺幕後進行。
試想像下:你原本班機全機爆滿,而你被安排到下一班機。航空公司唔係齋講聲對唔住,而係俾你一張下一班機嘅商務艙機票,仲有貴賓室待遇同餐飲券。雖然補償唔到你嘅不便,但肯定可以減輕你嘅不滿!
咁問題嚟喇:你情願遲啲先到,但係可以舒舒服服喺張平瞓嘅靚位度瞓?定係準時到,但係要屈喺經濟艙呢?
最後提提你
想用平好多嘅價錢飛高級艙等,冇話單一嘅秘訣,但係就可以透過好多唔同嘅策略達到目的。無論係用里數、競投、透過last minute優惠,又或者靠運氣,升級機艙其實比好多人想像中更易實現。
升級嘅方法有好多種,有啲就比較經濟實惠嘅,有啲就成本會高啲,但係機會就高好多。不過佢哋嘅共通點就係,可以將你嘅航班變成旅程中嘅一部分,等你未到目的地就已經享受到旅行嘅樂趣!你又試過用咩方法upgrade呢?歡迎同我哋分享下!
0 留言